Kif tibda l-karriera tiegħek fl-EFSA

Qed tfittex esperjenza ġdida? Jekk qed tfittex impjieg sinifikanti f’ambjent tax-xogħol verament internazzjonali, traineeship fl-EFSA huwa l-aqwa ħaġa għalik! Aħna noffru traineeships imħallsa bl-opportunità li nqattgħu 5 xhur sa 12-il xahar fil-kwartieri ġenerali tagħna f’Parma.

Aħna noffru traineeships lil kandidati mill-Istati Membri kollha tal-UE u mill-pajjiżi kandidati kif ukoll lil kandidati internazzjonali.

Ara t-traineeships kollha >

Għandek l-ingredjenti biex tkun it-trainee li jmiss tagħna?

Ix-xogħol fl-EFSA bħala trainee se jagħti bidu għall-karriera u l-esperjenza professjonali tiegħek fi kwalunkwe qasam li tispeċjalizza fih. Aħna qed nistennew bil-ħerqa li nilqgħu talenti żgħażagħ motivati minn sfondi akkademiċi u professjonali differenti (xjenzati, professjonisti tal-komunikazzjoni u legali, esperti tal-IT, eċċ.). It-tim internazzjonali tagħna ta’ speċjalisti huwa divers daqs l-ikel li nivvalutaw!

Esperjenza ta’ sena sħiħa

Int se tkun akkumpanjat minn konsulent li se jiggwidak u jħarrġek matul it-traineeship tiegħek. Hemm ukoll Komunità ta’ Trainees b’saħħitha fejn tista’ tiskambja esperjenzi mal-pari tiegħek u tibni networks soċjali li jistgħu jdumu għaddejjin aktar mit-traineeship tiegħek.

Matul it-traineeship imħallas, tkun tista’ tibbenefika minn ħafna mis-servizzi li l-EFSA toffri lill-impjegati tagħha:

Il-kultura u l-ispirtu tat-tim tagħna

Se taħdem f’ambjent internazzjonali, divers u ta’ ispirazzjoni.
Se tkun tista’ tipparteċipa f’ħafna avvenimenti organizzati mill-Komunità tat-Trainees.

Ambjent tax-xogħol stimulanti

Se jkollok l-opportunità li tinvolvi ruħek b’mod attiv fix-xogħol tagħna ta’ kuljum u tagħmel il-parti tiegħek fis-sikurezza tal-ikel fl-UE.
Parma hija ċ-ċentru tal-ikel: mhux biss se taħdem fuq proġetti relatati mas-sikurezza tal-ikel, iżda se tgħix ukoll f’belt imdawra bil-kultura tal-kċina.

Tkabbir u tagħlim fl-EFSA 

Se tiżviluppa u ssaħħaħ l-għarfien tiegħek dwar is-sikurezza tal-ikel u tal-għalf, il-produzzjoni tal-ikel u s-sostenibbiltà tal-ikel.
Se jkollok il-possibbiltà li tieħu sehem f’korsijiet ta’ taħriġ organizzati mill-EFSA.

Daqqa t’għajn lejn l-EFSA

570

Membri tal-persunal

Il-persunal tagħna ġej minn pajjiżi differenti tal-UE u jġib sfondi u esperjenzi differenti.

650

Esperti

Esperti esterni jingħaqdu mal-bordijiet xjentifiċi tagħna u jipprovdu lill-EFSA pariri speċjalizzati u indipendenti.

Trainees, Interims, xjenzati Mistiedna u Esperti Nazzjonali Sekondati

It-tim tagħna huwa arrikkit iżjed minn kollegi li jingħaqdu bħala trainees, interims, xjenzati Mistiedna u Esperti Nazzjonali Sekondati li jsaħħu l-persunal tagħna għal żmien limitat.

Kif issir trainee

Sottomissjoni tal-applikazzjoni

Oħloq il-kont tiegħek fil-portal tar-reklutaġġ tagħna u segwi l-gwida pass pass fil-manwal għall-kandidati.
L-applikazzjoni tiegħek se tiġi skrinjata abbażi tal-kriterji tal-eliġibbiltà.
Jekk int adattat għall-kariga ta’ traineeship, tiġi kkuntattjat għal intervista bit-telefon jew online biex jiġu diskussi l-aspettattivi u d-disponibbiltà tiegħek.
Id-deċiżjoni finali hija f’idejn id-Direttur Eżekuttiv tagħna, abbażi tar-rakkomandazzjoni tal-unità/tat-tim. Il-kandidati magħżula jirċievu ittra elettronika ta’ offerta fil-profil tagħhom.

Kriterji ta’ eliġibbiltà

Irid ikollok grad universitarju sħiħ ta’ mill-inqas 3 snin sad-data tal-għeluq tal-applikazzjonijiet.
Għandu jkollok għarfien tajjeb tal-Ingliż (mill-inqas livell B2 skont il-Qafas Komuni Ewropew ta’ Referenza għal-Lingwi – QKERL).

X’għandek tistenna mit-traineeship tiegħek

Se tikseb esperjenza professjonali f’Aġenzija Ewropea xjentifika ewlenija.
Tista’ tespandi n-network professjonali u/jew xjentifiku tiegħek.
Tista’ tiżviluppa u ssaħħaħ il-ħiliet u l-kompetenzi tiegħek fil-qasam ta’ interess magħżul.
Traineeship fl-EFSA jista’ jagħti spinta lill-karriera fil-qasam ta’ interess tiegħek.

1. Min jista’ japplika għal traineeship?

Ir-residenti legali kollha fl-Istati Membri tal-UE u l-Pajjiżi Kandidati tal-UE, u l-kandidati internazzjonali. Trid tkun ksibt grad universitarju sad-data tal-għeluq tal-applikazzjonijiet. Aktar dettalji dwar il-proċess ta’ applikazzjoni u l-kriterji ta’ eliġibbiltà jistgħu jinstabu fl-Avviż ta’ Post Vakanti.

2. X’inhi l-lingwa ta’ ħidma fl-EFSA?

Se taħdem f’ambjent internazzjonali bl-Ingliż bħala l-lingwa ta’ ħidma ewlenija. Għarfien tajjeb tal-Ingliż, miktub u orali, huwa għalhekk essenzjali. Aħna neħtieġu B2 bħala livell minimu, skont il-QKERL (Qafas Komuni Ewropew ta’ Referenza għal-Lingwi).

3. It-traineeship tal-EFSA huwa mħallas?

Iva, it-trainees jingħataw għotja kull xahar. L-ammont tal-għotja jiġi aġġornat fuq bażi annwali u ddikjarat fis-sejħa għat-traineeship. Bħala trainee int għandek ukoll id-dritt għal rimborż tal-ispejjeż tal-ivvjaġġar tiegħek mal-wasla u mat-tluq. L-ammont li għandu jiġi rimborżat jiġi kkalkulat skont id-distanza bejn l-EFSA u l-post tal-oriġini tiegħek.

4. X’inhu t-traineeship?

In-natura tal-ħidma se tiddependi mit-tim li int assenjat għalih, iżda t-traineeship se jagħtik l-opportunità li:

• Tikseb esperjenza diretta tax-xogħol ta’ Aġenzija xjentifika tal-UE u tiżviluppa kompetenzi u ħiliet ġodda f’konformità mal-interessi personali u l-aspirazzjonijiet professjonali tiegħek.

• Tikkontribwixxi għall-objettivi ġenerali tal-unità billi tappoġġa l-abbozzar ta’ dokumenti u rapporti, l-immaniġġjar ta’ xogħol xjentifiku u/jew amministrattiv, u l-komunikazzjoni f’waqtha tar-riżultati.

• Tikkontribwixxi għal proġetti u attivitajiet speċifiċi b’ideat ġodda u soluzzjonijiet innovattivi.

• Tikkontribwixxi għall-ippjanar u l-monitoraġġ tal-attivitajiet tal-unità.

• Tipparteċipa f’opportunitajiet ta’ taħriġ, li jgħinuk tikber b’mod professjonali.

Links utli

Skopri aktar dwar il-ħajja f’Parma

Ara l-webinar

Dokumenti

Irċievi avviżi dwar l-impjiegi

Fil-bażi tad-data tal-impjiegi tagħna tista’ tirreġistra biex tapplika għal pożizzjoni miftuħa u tirreġistra għal avviżi dwar impjieg jekk bħalissa ma jkun hemm l-ebda impjieg xieraq disponibbli.

Mur fuq il-portal tal-impjiegi tagħna